اسم العمل
نوع العمل
رواية
اسم الكاتب
شريف محمد نصر
تدقيق لغوي
ندى الجندي
تصميم الغلاف
هبه هويدي "ذات النطاقين"
تصميم داخلي وتنسيق
حورية مصطفى
الاقتباس
لم يستطع (شريف حسني) أن ينكرَ أنه ينسى كثيرًا رغم أنّ عمره لم يتعدَّ الخامسة والثلاثين عامًا، بغض النظر طبعًا عن شعره الذي اكتسى بالبياض، الذي زاده وقارًا وروعةً وإجلالًا، إلى جانب طوله الذي تعدى (180 سم)، ولا نغفل عن بعض الوزن الزائد، حاله كحال غيره من الرجال هذه الأيام.
لم يُدرك شريف أنّ نسيانه ربما يعود لمشكلة صحية أو خلل ما في وظائف المخ كما قد يُفكر شخص آخر، فهو يعتقد أنّ حاله كحال أغلب مهندسين المواقع الذين يتعاملون ليلًا ونهارًا مع الكثير من العُمال والمقاولين والرؤساء والمرؤوسين، خصوصًا مع عمله كمهندس بترول يعمل على منصة بحرية، ويتخذ البحر صديقًا طوال أسبوعين كل شهر.
هو يعتقد أنّ مجال عمل أي شخص كطبيب أو مهندس أو ضابط أو محاسب أو صاحب عمل، يجعلك عُرضة للنسيان والغفلة عن الكثير من الأشياء نتيجة لحجم الضغط العصبي والنفسي الذي تتعامل معه يوميًّا.
يعيش شريف بشقته مع زوجته الجميلة (حنان مدكور) التي تخلت عن عملها لأجله ولأجل طفلته (هُدى)، فهي تعلم أنها لن تستطيع التوفيق بين العمل وبين حاجات زوجها وطفلتها إليها، خصوصًا أن شريفًا يبقى بعيدًا عن زوجته وطفلته، بل وأهله وأصدقائه طوال خمسة عشر يومًا كل شهر.
في بيت شريف حسني بالقاهرة..
يجلس شريف وبجواره حنان زوجته يشاهدان التلفاز، وحوله ابنته هدى تلعب بعشرات العرائس التي اشتراها لها أبواها، فتقول حنان لزوجها بود:
حبيبي، ماما وبابا بيسألوا عليك عاوزين يشوفوك، من وقت ما بدأت إجازتك وإحنا ما رُحناش نزورهم!
عادي يا حبيبتي، طمنيهم عليّا.. ما إنتِ شايفاني كويس أهو، وحاضر بس أرتاح شوية كدا اليومين دول، وبعدين نروح نزورهم حاضر.
مش عارفة هتبطل كسلك دا إمتى بصراحة؟!
أبطل؟! حبيبتي مفيش مهندس مش كسول وقت الإجازة بتاعته، عارف إنك عاوزة تخرجي وتتفسحي إنتِ وبنتنا، وعاوزة تروحي لصاحباتك وكل دا، بس والله مينفعش أوعدك بكل دا؛ عشان غالبًا مش هبقى صادق في وعدي، بس فعلًا هرتاح شوية وهعملك كل اللي إنتِ عاوزاه.
ماشي يا حبيبي، الإجازة لسه في أولها وهنشوف، تعالي يا هُدى بوسي بابا وقوليله شكرًا عشان ناوي يخرجك آخر الأسبوع بعد ما يرتاح اليومين دول.
آآه! دي توريطة بقى يا حنان يا حبيبتي.
صحيح يا بابا هنخرج كمان يومين؟
آه يا حبيبتي إن شاء الله، إنتِ عاوزة تروحي فين؟
نروح الجنينة وتجري ورايا وأركب مراجيح مع العيال، وتجيبلي آيس كريم.
شُفت البنت فرحت إزاي، مكبوتة يا عيني!
حاضر يا حبيبتي، هنخرج كلنا وهنقول لعمو حازم كمان يجيب طنط غادة ويقابلونا في الجنينة.
طب ما نشوف هبة وهاني لو عاوزين ييجوا معانا الأول قبل حازم وغادة؟
امم، وماله! أختك وجوزها أولى بردو مفيش مشكلة، وأبقى أقابل أنا حازم في وقت تاني.
طيب وماما وبابا اللي عاوزين يشوفوك دول مش هنروحلهم بردو؟!
لا طبعًا هنروحلهم، مقدرش أتأخر عن عمي مدكور وطنط أم حنان أكيد.
طنط أم حنان؟!
آه حماتي طبعًا، مالها؟!
كويسة بتسأل عليك إبقى زورها، اسمها كريمة يا شريف؛ ماما كريمة.
ما أتا عارف طبعًا، هوا أنا هنسى اسم حماتي! بس أم حنان تحسيه في حنية كدا، زي أم عبير بردو تحسيه فيه ريحة حلوة كدا.
حبيبي إنتَ بتنسى، أنا عارفة متهزرش.
لا مبهزرش طبعًا، أنا بنسى أكيد، دا أنا بتعامل مع كمية أسامي مهولة، كويس إني بفتكر اسمك أصلًا!
نعم؟!
قصدي اسمي، كويس إني بفتكر اسمي.. يلا هقوم أنام بقى، هتنامي في حضن بابا يا هدهد يا حبيبتي؟
يلا يا بابا يا حبيبي.
هاني عبد الرءوف؛ هو طبيب مخ وأعصاب ممتاز، يعمل بالمستشفى الجامعي، حاصل على الدكتوراة، ولديه عيادة كبيرة يعمل بها بعد أوقات عمله بالمستشفى، وهو متزوج من هبه مدكور -الشقيقة الكبرى لحنان زوجة شريف حسني- والتي تعمل طبيبة كذلك في نفس المستشفى الجامعي، وكان هاني زميلًا لزوجته هبه أثناء الدراسة الجامعية، حيث أنهيا دراستهما بالحصول على مرتبة الامتياز، وتزوجا بعد التخرج بعدة شهور.
رغم أنّ هاني كان طبيبًا للأعصاب، إلا أنّه كان عصبيًّا جدًّا، وخصوصًا مع أطفاله اللذين يحبهما كثيرًا، لكنه ينزعج من صراخهما وعنادهما وشقاوتهما الحلوة، وعندما يتملكه الغضب والعصبية تكاد نظارته الطبية تغادر مكانها لتهرب من صوته العالي، وكم كنت أتمنى أن تسقط منه؛ لأنه عندها سيتوقف عن صراخه للبحث عنها، فهو لا يحب أن يظهر أمام أحدٍ بدونها.
داخل مكتب قسم المخ والأعصاب بالمستشفى الجامعي.. كان هاني يجلس في مكتبه بالمستشفى الجامعي يطالع بعض التقارير وصور الأشعة المختلفة لبعض مرضى قسم المخ والأعصاب في اهتمام وتركيز كبيرين، عندما دخلت الممرضة مكتبه فقال بجدية وقد ترك الأوراق والتقارير من يديه:
أوضة العمليات جاهزة عندك، المريض، الأشعة، التخدير، التمريض، الدكتور المساعد؟
كله جاهز يا دكتور هاني، مش ناقص غير بس حضرتك تبص على أشعة المخ للمريض.
هوا أنا مبصيتش عليها لسه؟! دا المريض جايبها من أسبوع تقريبًا.
من أسبوعين، بس حضرتك كنت في مؤتمر شرم الشيخ.
طب هاتي كدا أشوفها بسرعة.
اتفضل.
هو معملش أشعة على الأوردة والشرايين؟!
محدش طلبها منه حضرتك!
طيب العملية دي هتتأجل أسبوع لحد ما يعمل الأشعة دي ويجيلنا تاني.
بس دا هما كانوا حجزوله سرير في الرعاية النهاردا على أساس إنه هيعمل العملية دلوقتي!
